NEET UG 2023 - MEDICAL ENTRANCE; രജിസ്ട്രേഷൻ ആരംഭിച്ചു

മെഡിക്കൽ പ്രവേശന പരീക്ഷയായ നീറ്റ് (നാഷണൽ എലിജിബിലിറ്റി കം എൻട്രൻസ് ടെസ്റ്റ്) യുജി - 2023 ഓൺലൈൻ രജിസ്ട്രേഷൻ ആരംഭിച്ചു.

ഇന്ത്യയിലെ അംഗീകൃത/അംഗീകൃത മെഡിക്കൽ/ഡെന്റൽ/ആയുഷ്, മറ്റ് കോളേജുകൾ/ഡീംഡ് യൂണിവേഴ്‌സിറ്റികൾ/ഇൻസ്റ്റിറ്റ്യൂട്ടുകൾ (AIIMS & JIPMER) എന്നിവിടങ്ങളിലെ എംബിബിഎസ് /ബിഡിഎസ്/ബിഎഎംഎസ്/ബിഎസ്എംഎസ് /ബിയുഎംഎസ്/  ബിഎച്എംഎസ്, മറ്റ് ബിരുദ മെഡിക്കൽ കോഴ്‌സുകളിലേക്കുള്ള പ്രവേശനത്തിനായാണ് നീറ്റ് യു ജി നടത്തുന്നത്.

അപേക്ഷിക്കാനുള്ള യോഗ്യത:

ഫിസിക്‌സ്, ബയോളജി/ബയോടെക്‌നോളജി, കെമിസ്ട്രി, ഇംഗ്ലീഷ് എന്നീ വിഷയങ്ങൾ ഉൾകൊള്ളുന്ന അംഗീകൃത ബോർഡിൽ നിന്ന് 10+2 അല്ലെങ്കിൽ തത്തുല്യ ഡിപ്ലോമ ഉണ്ടായിരിക്കണം. ഇപ്പോൾ പരീക്ഷ എഴുതുന്നവർക്കും നീറ്റിന് അപേക്ഷിക്കാൻ അർഹതയുണ്ട്. 

ഫിസിക്‌സ്, ബയോളജി/ബയോടെക്‌നോളജി, കെമിസ്ട്രി എന്നീ വിഷയങ്ങളിൽ പൊതുവിഭാഗത്തിന് കുറഞ്ഞത് 50% മാർക്കും, SC/ST/OBC വിഭാഗത്തിന് 40% മാർക്കും, ശാരീരിക വൈകല്യമുള്ളവർക്ക് 45% മാർക്കും മൊത്തം സ്‌കോറുകളായി നേടിയിരിക്കണം.

അപേക്ഷകർക്ക് 2022 ഡിസംബർ 31-ന് 17 വയസ്സ് പ്രായമുണ്ടായിരിക്കണം.

അപേക്ഷിക്കാൻ ആവശ്യമുള്ള രേഖകൾ:

1. 10 & 12 ക്ലാസുകളിലെ   മാർക്ക് ഷീറ്റ് 

2. സമീപകാല പാസ്‌പോർട്ട് സൈസ് ഫോട്ടോ (80% മുഖം വെളുത്ത പശ്ചാത്തലത്തിൽ ചെവികൾ ഉൾപ്പെടെ ദൃശ്യമാകുന്ന രീതിയിൽ)

3. ഒപ്പ്

4. പോസ്റ്റ്കാർഡ് (6x4) വലുപ്പമുള്ള ഫോട്ടോ

5. ഇടതും വലതും കൈകളുടെ വിരലടയാളങ്ങൾ

6. അഡ്രസ് പ്രൂഫ് (ആധാർ/ബാങ്ക് പാസ്ബുക്ക്/സ്കൂൾ ഐഡി കാർഡ് etc.)

7. കാറ്റഗറി സർട്ടിഫിക്കറ്റ് (SC, ST, OBC, EWS) , ഉണ്ടെങ്കിൽ.

അപേക്ഷാ ഫീസ്:

▪ജനറൽ:  ₹ 1,700/-

▪ജനറൽ-ഇഡബ്ല്യുഎസ്/ഒബിസി-എൻസിഎൽ: ₹ 1,600/-

▪എസ്‌സി/എസ്ടി/പിഡബ്ല്യുബിഡി/മൂന്നാം ലിംഗക്കാർ: ₹ 1,000/-

▪ഇന്ത്യക്ക് പുറത്തുള്ളവർ: ₹ 9,500/-

പ്രവേശന പരീക്ഷ മെയ് 7 ഞായറാഴ്ച നടക്കും.

കീം രജിസ്ട്രേഷൻ നിർബന്ധം, കേരളത്തിൽ പ്രവേശനം നീറ്റ് സ്കോറിന്റെ അടിസ്ഥാനത്തിൽ

കേരളത്തിൽ ബിരുദതല മെഡിക്കൽ, മെഡിക്കൽ അനുബന്ധ കോഴ്സുകളിലെ പ്രവേശനത്തിനുള്ള മാനദണ്ഡം നീറ്റ് പരീക്ഷ തന്നെയാണ്. മെഡിക്കൽ വിഭാഗത്തിലെ ആറ് പ്രോഗ്രാമുകൾക്കും മെഡിക്കൽ അലൈഡ് വിഭാഗത്തിലെ ഏഴ് പ്രോഗ്രാമുകൾക്കും നീറ്റ് യു.ജി. – 2023 ബാധകമാണ്.

കേരളത്തിൽ പ്രവേശനമാഗ്രഹിക്കുന്നവർക്ക്, കീം രജിസ്ട്രേഷൻ ചെയ്യണം. നീറ്റ് പരീക്ഷയിൽ യോഗ്യത നേടിയവർ അവരുടെ നീറ്റ് സ്കോർ യഥാസമയം കേരളാ പ്രവേശന പരീക്ഷാ കമ്മിഷണറുടെ വെബ് സൈറ്റിൽ അപ് ലോഡിങ് നടത്തിയാൽ മാത്രമേ, കേരളാ  മെഡിക്കൽ, മെഡിക്കൽ അലൈഡ് റാങ്ക് പട്ടികകളിലേക്ക് അവരെ പരിഗണിക്കുകയുള്ളൂ.